Cita-citane Hannah Al Rasyid bisa main ing film action wusanane kasembadan uga, yakuwi ing film omnibus 3Sum. Ing bagean kang mawa judhul ‘Impromtu’, Hannah dadi Lina kang nduweni misi kanggo mburu pawongan.
3Sum nggabungake telung film cendhak kang mawa judhul ‘Insomnight’, ‘Rawa Kucing’ lan ‘Impromtu’, kang saben film nduweni genre kang beda yakuwi horor, drama, lan action.
“Aku seneng banget main film iki. Aku lagi main ing sawenehing film lan ora duwe jeneng kang gedhe, nanging aku pengin banget dadi bagian ing jagading perfilman. Kaya sing mbok ngerteni kabeh, aku ndhisike silat lan pengin banget main film action lan lagi iki kasembadan ing kene” ujare Hannah nalika jumpa pers film 3Sum ing Epicentrum XXI Kuningan, Jakarta Selatan sawenehing wektu kepungkur.
“Ing kene ana adegan fight nganti take kaping 14. Nanging aku tetep semangat nindakake” tambahe.
Melu ambyur ing proyek film action mesthi wae ora adoh saka resiko. Bab iki uga dialami dening Hannah, yakuwi nganti nandhang lara ing bangkekane nalika latihan koreografi kanggo Impromtu.
”Aku sempat kelaran nalika training ing bagean bangkekanku merga kudu nendhang dhuwur. Nanging kedadeyan lucu pas syuting malah dialami lawan mainku kang njaluk dipukul temenan. Mangka dheweke kuwi sawijining stuntman, eh dheweke ngaku kelaran pas tak tendhang ing dhadhane” imbuhe Hannah.
Timnas Silat Inggris
Saliyane nduwe profesi minangka pemain film, modhel lan presenter, artis ayu Hannah Al Rasyid iki pancen uga sawijining atlet. Wanita kelairan London iki ndhisik sawijining atlet pencak silat.
Dheweke kepara tau dadi perangan tim nasional ing kutha kelairane kuwi. Ora mung iku wae, Hannah wis akrab klawan jinis bela diri kaya ngene wiwit cilik.
“Aku tau dadi guru silat lan mlebu tim nasional ing Inggris. Dadi duwe basic bela diri, pungkasan tandhing 2007” jlentrehe Hannah.
Mula kuwi, artis umur 26 taun iki ora pati kangelan kanggo nindakake adegan action ing film Impromptu kang ana ing film omnibus 3Sum mau.
Ing film garapan Andri Cung, William Chandra lan Witra Asliga iki, karakter Hannah digambarake minangka wanita ayu kang pinter bela diri.
“Wiwit ndhisik pancen pengin banget oleh film action. Wusanane oleh uga peran ing film iki” tambahe mantan VJ MTV iki.
Hannah ngaku ora pati kangelan nalika nindakake adegan-adegan mau merga background-e minangka atlet pencak silat. Luwih-luwih, sadurunge proses syuting, dheweke sempat latihan bela diri kanthi intensif suwene rong minggu.
“Aku uga sempat latihan gerakan tangan lan sikil kayadene capoeira ngono kae sadurunge syuting” ujare Hannah. Film 3Sum iki diputer ing bioskup-bioskup Cinema 21 wiwit tanggal 31 Januari 2013 kepungkur. (d)***