Tugase pers (wartawan) salugune sairib karo para Nabi ing jaman kawuri, yaiku aweh pawarta kang ngajak marang tindak budi rahayu sarta aweh pepenget kanggo umum (umat). Ing bukune kang mawa irah-irahan “Jurnalisme Profetik” Parni Hadi ngajak insan pers bisa nuladha lekase para Nabi, nenulis kang anapas amar makruf nahi mungkar, ora kebablasen malah dadi alate pehak sing lagi kuwasa.
Buku “Jurnalisme Profetik” RIKALA Gubernur DKI Jakarta Joko Widodo resmi didhaulat dadi Capres PDIP, koran, TV lan media sosial (internet) rame martakake. Ning yen ing stasiun TV One, sing digedhek-gedhekake malah bab kaya ngapa sengite budayawan Ridwan Saidi marang Jokowi. Liya wektu sing digiyarake bab kegagalan-kegagalane Jokowi ngurusi banjir lan kemacetan, sarta Jokowi sing durung kasil mberesi Jakarta wis arep nyapres. Wis ta, sasuwene Jokowi kampanye sing diangkat mesthi bab kekurangane Capres PDIP kasebut.
Buku “Jurnalisme Profetik” RIKALA Gubernur DKI Jakarta Joko Widodo resmi didhaulat dadi Capres PDIP, koran, TV lan media sosial (internet) rame martakake. Ning yen ing stasiun TV One, sing digedhek-gedhekake malah bab kaya ngapa sengite budayawan Ridwan Saidi marang Jokowi. Liya wektu sing digiyarake bab kegagalan-kegagalane Jokowi ngurusi banjir lan kemacetan, sarta Jokowi sing durung kasil mberesi Jakarta wis arep nyapres. Wis ta, sasuwene Jokowi kampanye sing diangkat mesthi bab kekurangane Capres PDIP kasebut.
Ing jagad internet uga mengkono. Yen Detik.Com tansah satimbang martakake Capres Jokowi – Prabowo – Aburizal Bakrie lan liya-liyane, portal berita Okezone.Com sing ditonjolake uga bab serangan-serangan kang tumuju ing Jokowi. Malah ana koran Jakarta sing “nglawan arus”. Rikala koran liyane martakake pencapresan Jokowi, dheweke gawe irah-irahan sing beda dhewe: Jokowi khianati rakyat Jakarta. Wis ta, kanggone koran mau, Capres Jokowi ora ana apike.
TV nguwasani jagad
Kaisar Prancis Napoleon Bonaparte (1804-1814) nate kandha, satus mriyem aku ora wedi, nanging yen pena (tulisan wartawan) iku sing takwedeni. PM Inggris Winston Churchil (1940-1945) uga nate pratela, pena (tulisan wartawan) iku luwih dening landhep tinimbang pedhang. Ora keri Thomas Jefferson Presiden AS katelu (1801-1809) uga ngandhakake, “Aku milih ndarbeni pers tanpa negara tinimbang negara tanpa pers.”
Parni Hadi ing ndalem peluncuran buku asil karyane Pratelane para pinunjul iku nggambarake kaya ngapa aji lan dayane pers tumrape bebrayan. Pers sing bisa mbangun opini publik (panemune bebrayan) banget diwedeni para penguasa ing ngendi wae. Mula BJ Habibie rikala isih ngasta Menristek nate nggresula gegayutan karo dibreidele majalah Tempo (1994). Tulisane perkara pembelian kapal bekas saka Jerman ing majalah mau pancen njalari BJ Habibie ora bisa turu pirang-pirang dina, nanging saiki bisa gawe “turu”-ne Tempo kanggo salawase.
Kadigdayane pers kanggo mengaruhi publik pancen ngedab-edabi. Luwih-luwih bareng pers modern wis tepung karo televisi lan jagad maya (internet), sapa sing bisa nguwasani stasiun TV lan internet prasasat bisa murba wasesa jagad. Mula ora elok, gegayutan karo Pileg-Pilpres 2014 iki, para benggol parpol lan Capres-Cawapres padha jor-joran nguwasani koran, TV lan internet.
Hary Tanusudibyo Cawaprese Wiranto (Hanura) upamane, dheweke darbe RCTI, Global TV, MNC TV, Sindo TV, Okezone.com. Banjur Aburizal Bakrie (Golkar) nguwasani TV One lan Anteve; Surya Paloh (Ketum Nasdem) duwe Metro TV. Lumantar gaman media elektronik kasebut, para Capres jor-joran ngonyol-onyolake awake dhewe minangka “Kecap Nomer Satu”. Senajan ambal-ambalan antuk pepenget saka KPI (Komisi Penyiaran Indonesia), dianggep mbelgedhes. Mangka yen ngenut UU Penyiaran pasal 36 ayat 4 wis digarisake: isi siaran kudu netral, ora kena mikolehake marang golongan tinamtu.
Kalangan insan pers sing padha ngemudheni media elektronik kasebut, kejaba kaiket dening UU Penyiaran uga kecencang dening kode etik wartawan. Ning dinane iki, racake wis padha manjilma dadi jurnalis transaksional.
Senajan satemene cengkah karo ati nurani, nekad gawe garapan tayangan kejem sing mung ngongasake Capres pandarbe TV, nanging ngeblagake utawa “mateni” Capres liyane. TV One lan Anteve upamane, yen martakake kasus Lumpur Lapindo mesthi diganti “Lumpur Sidoarjo”, awit yen nganggo istilah “Lapindo” ateges ngantemi Aburizal Bakrie dhewe.
Kaya nabi
Kantor LKBN lawas, berita-beritane dadi sumber resmi pemerintah Lumantar buku “Jurnalisme Profetik” (Pergulatan – Teori – Aplikasi), Parni Hadi kang mantan Dirut RRI lan LKBN “Antara” iku nyoba elik-elik utawa njewer para insan pers sing kebablasen jroning nindakake praktek jurnalistik. Jer yen digoleki inti utawa sari pathine, pers mono uga ngemban jejibahan adi kanggo nglawan tindak kebatilan utawa amar makruf nahi munkar, kang tlonjonge kanggo memayu hayuning bawana (rahmatan lil alamin).
Menawa diwawas saka ilmu linguistik, istilah “Profetik” salugune plesetan saka tembung baku “Prophetik” kang ing basa Inggris mengku teges: kenabian. Krana mengkono werdine istilah “Jurnalisme Profetik” yaiku: pratek jurnalistik kang nuladhani lekase para Nabi ing jaman kawuri. Jer yen digagas klawan meneping pikir, tugas kewartawanan iku sairib karo tugas kenabian.
Ing ndalem Qur’an Allah Swt paring dhawuh: Lan Ingsun ngutus marang para rasul ora ana liya kejaba nekakake kabar nyenengake sarta minangka aweh pepenget. (QS Alkahfi: 56). Ing surat Alfatir ayat 24 uga dingendikakake: Satemene Ingsun ngutus marang sira (nabi) kanthi nggawa bebener minangka kabar kang nyenengake sarta aweh pepenget.
Tugas lan jejibahane pers ya ora adoh saka iku, aweh pepenget lan panglipur marang bebrayan, saengga Parni Hadi darbe dudutan, salugune wartawan kuwi penerus lan pewaris tugas kenabian. Para nabi tumindak wewaton dhawuh lan pituduhing Gusti Kang Murbeng Dumadi sarana laku spiritual, mituhu lan eklas, sarta tresna marang sasama. Jurnalisme Profetik semono uga, ngumpulake lan ngolah bahan-bahan saperlu digiyarake dadi sawijining informasi. Kanthi ngetog tenaga lan pikiran, intelektual lan spiritual, wartawan nyebarake informasi mau kanggo leladi marang bebrayan tanpa mawas suku, ras, agama lan ideologi.
Nanging senajan lelandhesane asih marang sasama, ora ateges penggilut Jurnalisme Profetik banjur gelem dijak kompromi marang laku kadursilan, klebu ngadhepi praktek-praktek korupsi. Dhestun kanthi cara investigative reporting (laporan komplit penyelidikan), Jurnalisme Profetik tanpa kendhat nglawan marang pakarti korupsi.
Minangka ngibadah
Jurnalisme Profetik kena diarani dadi “sari pathi” lan kenthosane gagasan Parni Hadi rikala leladi marang jagad pers 41 taun seprena-seprene, diwiwiti dadi reporter ing LKBN “Antara”, nyekel Perwakilan Antara ing Jerman Barat, mimpin koran Republika, dadi Dirut LKBN Antara, sarta Dirut RRI. Patang dekade niba-nangi ing donyaning media massa, Parni Hadi darbe dudutan, makarya dadi wartawan iku minangka ngibadah.
Wiwit jaman Orde Baru nganti jaman reformasi, Parni Hadi wis katog ngrasakake bungah susahe lelayanan karo pejabat pemerintah. Luwih-luwih LKBN “Antara” papane leladi mujudake kantor berita resmi negara, kang dadi barometere “pers bebas dan bertanggungjawab”. Lire, samubarang kalir kang wertakake “Antara” mesthi dijamin wis aman sakabehane.
Jamane Pak Harto sing kuwasa nganti 32 taun, kontrol pers kencenge kepati-pati. Pers kena ngritik pemerintah, nanging aja nganti ngganggu stabilitas nasional kang ateges ngganggu pembangunan. Wewaton “Jurnalisme Profetik” mau, pers kudu ngerti slah-e utawa baud golek “jalan tengah” saengga jroning mertakake maneka warna masalah, bebasan kena iwake ora nganti buthek banyune. Maklum, jaman Orde Baru wis pira wae koran lan majalah sing palastra siya-siya merga kurang luwes ngritik pemerintah.
Post a Comment Blogger Facebook