Gubernur Jatim DR H Soekarwo nalika nyambangi Didik Susanto (tengah) Mesakake pancen ndeleng nasibe keluwargane Nurul Faridatul Hasana (18). Nasib sing mrihatinake iki klakon ngundang kawigatene sakehing pehak. Sawise Kadinkes Surabaya Febria Rachmanita lan Kadispendik Iksan, giliran Mendikbud Mohammad Nuh, lan Gubernur Jatim Soekarwo, sarta Kepala Dikbud Jatim Harun ganti kang rawuh menyang omahe Nurul. Para pejabat kasebut ndherek paring dalan becike slaras karo wenange dhewe-dhewe.
Lho apa masalahe? Pranyata, Nurul sing isih kelas XII SMAN 3 Surabaya iki nedya arep ngedol ginjele klawan rega Rp 70 yuta kanggo nambakake bapake, ibune lan adhine sing lagi lara.
Dening Kadinkes Febria Rachmanita, telu-telune langsung dipriksakake ing RSUD dr Soewandhie. Kejaba iku, dening Gubernur Jatim Soekarwo, sekabehane dipriksakake menyang RSUD dr Soetomo. Dheweke kabeh uga di-rongent kanggo nyumurupi penyakite,” ujare Febria.
Asile sawatara saka pemeriksaan kasebut wis bisa disumurupi. Sadurunge Nur Hayati disebutake lagi nandhang lara kista, nanging adhedhasar pemeriksaan sawatara, mung nandhang infeksi lan ing saluran banyu senine ana watune. Dene Nur Ayu, pancen ana prongkolan utawa tumor ing kupinge sisih kiwa. Malah, adhedhasar pemeriksaan, klebu foto toraks, dheweke uga suspect tuberkulosis (TB). “Nur Ayu iku suspect TB, nanging durung tamtu TB,” jlentrehe. Didik dhewe nuduhake kahanan kang ora sepira nemen. Dheweke mung kaserang stroke, nanging isih ing golongan entheng.
Sawise dianakake pemeriksaan, telu-telune pasien iki ditetepake nindakake rawat jalan. Febria meling, utamane marang Didik, supaya tansah ngontrolake kesehatane. Sebab, nalika nindakake tes, tekanan darahe Didik cukup dhuwur, yaiku 150/100 mmHg. Bab kasebut dianggep mbebayani, utamane tumrap pawongan kang wis nate ketaman stroke.
Febria nambahake, kabeh ragad pengobatan marang kulawarga kesrakat kasebut bakal ditanggung Dinkes Surabaya. Saliyane iku Dinkes bakal ngurusake JKN (jaminan kesehatan nasional). Sebab, Badan Penyelenggara Jaminan Sosial Kesehatan (BPJS) mung nanggung ragad mertamba nganti anak nomer telu. Mula iku, pehake bakal nanggung supaya pengobatane Nur Ayu bisa gratis. Klebu nanggung ragad transportasi nalika mertamba.
Gubernur Jatim Soekarwo sing paraban akrabe Pakde Karwo iki uga nyambangi warga Bulak Banteng, Kenjeran, Surabaya kasebut nalika priksa menyang RSUD dr Soetomo. Kejaba iku Pakde Karwo uga nyambangi omahe Didik Susanto, mesisan paring bantuwan kehe Rp 30 yuta.
Pakde Karwo didhampingi Kabid Pelayanan Medis RSUD dr Soetomo dr Joni Wahyuhadi SpBS.
Asil pemeriksaan ing RSUD dr Soetomo iki mikuwati asil pemeriksaan kang ditindakake ing RSUD dr Soewandhie. Upamane abuh ing kupinge Nur Ayu. “Pranyata Kupinge Ayu ana saemper infeksi kang mrambat menyang perangan gulu. Mula iku, banjur abuh,” tandhese.
Joni nambahake, Ayu wis diwenehi obat tetes lan obat kang kudu diinum kanggo ngobati infeksi ing kupinge. Nanging, yen gulune panggah isih abuh, Ayu kudu nindakake pemeriksaan maneh. Dene asil pemeriksaan marang Didik lan Nur Hayati ora adoh bedane karo asil pemeriksaan kang ditindakake dening RSUD dr Soewandhie. “Ora ana kanker rahim utawa kista (marang Nur Hayati, Red). Mung ana infeksi saluran kemih. Wis diwenehi obat,” kandhane.
Didik ngandhakake, pehake nampa bantuwan dhuwit Rp 30 yuta saka Gubernur Jatim DR H.Soekarwo. “Dhuwit iku kanggo mertamba lan nyaur utang,” kandhane. Nanging, kanggo utang, Didik ngandhakake yen dheweke isih arep rembugan dhisik karo rentenir sing menehi utangan kasebut. Awit, utang nalika sasi Desember 2013 kehe Rp 12 yuta iku saiki wis mundhak dadi Rp 21 yuta. “Aku arep mbayar dhuwit pokoke wae,” ujare.
Didik nambahake, saliyane kanggo ragad mertamba, utangan Rp 12 yuta iku uga kanggo mangan saben dinane. Nanging sing paling akeh pancen kanggo tuku obat saraf.
Didik nerangake, dheweke saben dina nginum sawatara jinis obat. Sing paling larang obat jinis immunoglobutin. Yen dirata-rata, sedina dheweke kudu ngetokake dhuwit kanggo tuku obat kehe Rp 500 ewu. Obat immunoglobutin iki ora klebu kang ditanggung askes.
Manut dr Joni, obat iki pancen klebu larang regane. Obat iki mesthine kudu disuntikake, ora kanggo diinum. Joni kepengin nyumurupi sapa sing sabendina nyuntikake obat iku marang Didik. Manut Joni, satemene pasien stroke ora mbutuhake obat kasebut.
Direktur RSUD dr Soetomo Dodo Anando uga kepengin ngerteni akon-akonane Didik bab regane obat sing larang mau. “Dakgoleki sapa doktere sing nambani pasien iki,” tandhese.
Post a Comment Blogger Facebook