GuidePedia

0



Mungkin suatu hari kudunye ada nyang bikinin game khusus buat pemerentah kite. Ada nyang punya ide game-nye kira-kira kaya pegimane?



Kalo kata ane sih ini yeh, encang encing enyak babe sekalian, abis kelar Pokemon Go, game laen nyang kudu digarap pake cara augmented reality (AR) mestinye Grand Theft Auto (GTA).

Ane sebenernye kaga ngarti ape enaknya maen nangkepin mahluk kaga jelas kaya Pokemon, Digimon, Sempakmon, atau apaan aje dah seterah. Lucu aje gitu ngeliatin orang seliwar-seliwir kaya seterikaan sambil megangin hape. Kapan itu ane baca berita ada orang di Ostrali lagi asyik maen eh nemuin mayat. Ada juga berita laen nyang ane baca: ‘Ditusuk Orang Asing, Pemuda Ini Lanjut Berburu Pokemon’. Lah kuat amat. Sumanto kali yeh nyang maen?


Daripade gitu mending ane nangkepin tuyul, ketauan bisa bikin tajir. Kalo kaga nangkep Eddy Tansil kek. Kali aje dicatet jadi pahlawan nesiyenel. Mayan pan jadi ada gunanye idup buat bangsa dan negara.

Kesimpulan ane, Pokemon Go kaga terlalu asoy karena kurang menantang gitu deh. Coba kalo maenin GTA pake cara nyang sama. Wuih, bisa itu mah kite saban hari repolusi.

Ente kalo pernah maenin GTA, apalagi nyang versi San Andreas di PS 2 apa 3, pastinye sepakat sama usulan ane. Itu game emang kaga ada duanye dah. Enak banget. Ente bisa bebas ngelakuin ape aje semaunye. Bebas di sini artinye beneran yeh, bener-bener bebas.

Ente pengen ngapain? Nyolong motor? Sepele. Ngerampok mobil? Tinggal sikat. Ngegebokin sembarang orang? Pilih aje siape di jalan. Nerbangin pesawat? Maen aje ke bandara, pilih pesawat, terbangin dah. Masih kurang? Ente tinggal pilih: ngendarain kereta api apa naekin kapal tanker. Itu semua bisa ente lakuin kapan aje ente pengen. Seterah dah.

Jadi, misalnye ente ude bosen ngejalanin misi nih, ente tinggal keluyuran aje. Nemu mobil apa motor bagus, tinggal hadang di tengah jalan. Tarik orangnye nyang punya, tabokin deh. Ude tuh mobil sah jadi milik ente. Apa kaga enak?

Kalo dikejar polisi apa semacam Pam Swakarsa gitu, ente tinggal maenin cheat kebal peluru atau senjata nyang kaga abis-abis, sampe ente bosen sendiri terus nyerahin diri deh. Musuh terbesar ente di GTA cuma satu, kaya katanye engkong Sartre: ketahanan diri akan kebebasan. Itu doang.

Anjir, gaya beud ngomongin pilsapat kaya Thomas Darwin.

Nah, coba ente bayangin, game kaya GTA dimaenin dengan cara Pokemon Go. Pan ngeri-ngeri sedap pegimane gitu. Adrenalin jadi ngangkat. Nyali ente dites beneran. Berani kaga ente nabokin sembarang orang? Sanggup kaga ente ke Stasiun Beos terus jadi masinis dadakancommuter line? Atau ngebajak Lion Air terus ente terbangin ke Boyolali, berani kaga?

Kalo ente pengen jadi orang bae-bae, ente masih tetep bisa. Tapi jatohnye ente jadi antihero gitu dah: pahlawan, tapi penjahat, penjahat tapi pahlawan. Bingung yeh? Mangkanye kalo sekolah jangan cuma nyampe depan pager doang, Junaediiii…

Pegimane caranye jadi orang bae di GTA? Ente bisa ngumpulin anak buah terus bikin geng. Abis itu ente ngerampokin orang-orang kaya, terus hasil rampokannye ente bagiin ke orang-orang miskin. Kaya Kusni Kadut sama Bir Ali gitu dah.

Selain GTA, sebenernye ada lagi game nyang menurut ane bakal asoy banget dimaenin pake cara Pokemon Go. Nama game-nye: Shadow of the Colossus.

Wah ini game bangke bener! Tapi cuma jadi seru kalo ente maeninnye kaga pake buka gugel. Coba aje maenin bener-bener kaga pake bantuan apapun, manual doang. Kalo ente kaga pengen mecahin tipi atawa banting stik saking keselnye, ane seruput dah itu aer cucian kaki ente sampe daki-dakinye.

Pegimane kaga ngeselin, ini game kaga ada petunjuk pasti satu pun, kecuali aforisme-aforisme atau kalimat metafora kaga jelas nyang nongol di langit. (Ngarti kaga tuh aforisme sama metafora apaan???). Ude itu doang petunjuknye. Terus ente kudu jalan kaki atau naekin kuda ngiterin dataran nyang luas banget sampe musimnya gonta-ganti.

Nah, ntar di tiap lokasi, ente ketemu musuh bermacem monster nyang gedenye setinggi Monas semua. Ada nyang di dalem goa, di bawah aer, di balik pasir, sampe tau-tau terbang dari atas awan. Semua kaga terduga. Ente kaga bakal nyadar tanda-tanda apapun dah pokoknya. Tau-tau aje ente berhadepan sama monster raksasa bermuka badak berbadan kampret dengan suara khas kunyuk melempar buah.

Pan cihuy kalo maenin game kaya begitu di tengah belantara Jakarte. Siapa tau ente nemu monster ikan cupang raksasa di Muara Angke atau siluman bekantan di Jatinegara. Asal nyang keluar jangan Jonru aje. Bukannye maen, ntar malah diajakin ikut kelas menulis. Lah belangsak amat.

Ente kaga usah sewot kalo ide nyang ane tawarin kelewat imajiner atawa lebay. Lagian maeningame sambil keliling ngebawa-bawa hape kurang lebay apaan? Menurut ente cara nge-gamebegitu mungkin realistis, padahal mah justru surealis magis hiperbolis kulit manggis.

Mangkanye kite kaga useh ngadu congor mane nyang lebih lebay, nikmatin aje maen Pokemon Go sebelon pemerentah resek. Denger-denger sih, katanye Kementerian Komunikasi dan Informasi (Kemenkominfo) ude siap-siap mau ngeblokir tuh game bentar lagi.

Tapi ini sih lagu lama yeh. Orang belahan tetek binatang di pelem kartun aje diburemin, apa lagigame illegal kaya begini? Mungkin suatu hari kudunye ada nyang bikinin game khusus buat pemerentah kite. Ada nyang punya ide game-nye kira-kira kaya pegimane?

Ane sih ude punya. Tapi kaga usahlah ditulis di marih. Ntar kalo Mojok kena blokir, ente-ente juga nyang nangis sambil nyanyi mars Perindo. Ane kaga sanggup ngebayanginnye.

Post a Comment Blogger

Beli yuk ?