Komisi Pemberantasan Korupsi (KPK) wis mriksa artis telu kang gegayutan karo perkara pandu-ga pencucian uang kang ditindakake dening Tubagus Chaeri Wardana alias Wawan. Yen ditlesih luwih jero, pranyata telu-telune artis kasebut ana padhane, yaiku pranakan (blasteran). Kayadene pesinetron Jennifer Dunn. Artis ayu kang nampa mobil Toyota Vellfire saka Wawan iku keturunan Amerika-Jawa. Malah, pengacarane Jennifer Dunn, Hotman Paris Hutapea sadurunge uga mbenerake menawa Wawan ketarik marang modhel kelairan 10 Oktober 1989 (24) iku jalaran pranakan.
“Dheweke (Wawan, Red) kangelan golek wanita Indo kang ayu kaya dheweke (Jennifer, Red) kanggo PH (Production House)-e. Kanggo PH-ne migunakake dhapure dheweke (Jennifer). Apamaneh sawise dheweke sedot lemak, dheweke dadi Indo sing ayu merak ati. Rak beda karo foto-foto kang wis ana sadurunge,” kandhane Hotman nalika ing Gedhong KPK sawatara wektu kepungkur.
Artis kang nekani gedhong KPK gegayutan karo Wawan sabanjure yaiku Rebecca Soejati Reijman. Penyanyi kelairan Den Haag, Walanda 21 Pebruari 1985 (29) iku lair saka pasangan Robert Jean Lewis Reijman (Walanda) lan Rinie Soejati (Jawa Suriname).
Nanging, dheweke mbantah nampa paweweh saka sisihane Airin Rachmi Diany iki.
Pungkasan, Catherine Wilson. Modhel kelairan 25 Pebruari 1981 (32) iki minangka salah siji modhel Indonesia keturunan Inggris (bapak) lan Indonesia-Arab (ibu).
Sawatara iku, telu-telune artis kang sasuwene iki kondhang seksi, tampil beda nalika teka ing kantor lembaga antikorupsi iki. KPK ngundang Jennifer Dunn gegayutan karo paweweh adhine Gubernur Banten, Ratu Atut Chosiyah, arupa mobil Vellfire lan kartu kredit klawan ‘limit’ Rp 50 yuta sesasi. Kanggo nocogake kabar kasebut, dhek sawatara wektu kepungkur KPK manggil Jennifer Dunn.
Airin Rachmi Diany
Nalika teka menyang KPK, Jennifer sante lan andhap, nanging tetep katon ayune. Mudhun saka mobil Cadillac Escalade ireng, Jennifer menganggo clana jeans suwekan lan ndhuwuran putih sing rada nrawang. Ora kari, artis kang nate kesrimpet narkoba iki uga menganggo kacamata ireng. Hotman Paris nyebutake menawa Jennifer saiki luwih ayu lan pawakane saya lencir. Nalika teka menyang KPK, wanita mudha kasebut uga ora menganggo paes sing keladuk. “Sawise sedhot lemak ing Singapura, dheweke katon luwih ayu, lan Wawan gelem nganggo dheweke minangka ‘ikon’ PH-ne. Ora kanggo seks! Murni slaras karo penggaweyane dheweke,” ujare Hotman.
Banjur, Rebecca Reijman sing dhek minggu kepungkur dipriksa KPK. Dheweke disebut nate nampa wenehan mobil saka Wawan. Nalika teka ing KPK, Rebecca tampil menganggo dandanan sing sarwa ireng. Wanita kang kerep muncul ing majalah ‘pria dewasa’ iki menganggo sandhangan terusan dawa kang dirangkepi blazer ireng. Dene kacamatane nyepit irunge sing mbangir kuwi, sajak katon tambah merak ati.
Dheweke uga tansah mesem ngujiwat nalika mlebu lan metu ruwangan KPK. Manut juru wicara KPK Johan Budi SP, Rebecca wis nampa mobil siji saka Wawan. Nanging durung genah mereke apa lan regane pira.
Sawatara iku, artis Catherine Wilson wis kaping pindho diundang KPK gegayutan karo perkarane Wawan. Sing sepisan, panggilane diundur jalaran salah alamat. Panggilan kaping pindhone ditindakake Senin (24/2). Wanita Indo kang kondhang mawa jeneng Keket iki tampil prasaja. Menganggo klambi ungu lan kardigan klawu. Keket sajak sante nalika teka ing Gedhong KPK. Rambute sing wernane abang iku diore. Dheweke uga ora katon menganggo paesan nyolok. “Mangko wae ya, aku arep klarifikasi dhisik. Mengko kita ngobrol ya,” selake Keket.
Nissan Elgrand dibeslah
Catherine Wilson
KPK resmi mbeslah mobil Nissan Elgrand dhuweke Catherine Wilson. Mobil mewah iku dibeslah jalaran dinuga kuwat merga pawewehe Wawan. Mobil iku teka ing Gedhong KPK, Jl.HR Rasuna Said, Jaksel, Senin (24/2) watara jam 19.20. Sawise mlebu, mobil werna silver metalic nopol B 1387 SKB kasebut langsung digawa nuju parkiran mburi KPK. Ngganepi sakehing mobil mewah duweke Wawan kang wis dibeslah sadurunge. Kahanan parkirane KPK sajak kaya shoroom mobil mewah kae.
Ana watara petugas KPK lima kang ana ing njero mobil Nissan Elgrand kasebut. Bubar markir mobil, kabeh padha metu lan wegah komentar sakecapa.
Ora ana sing aneh ing njero mobil kasebut, sing katon mung parfum mobil gambar kupu-kupu kang gumandhul ing spion ngarep. Petugas njupuk mobil iki saka omahe Catherine ing BSD, Serpong, Tangerang Selatan. Wiwitane mobil iku nganggo jenenge Catherine. Nanging ing taun 2013, ana owah-owahan kepemilikan nganggo jenenge sedulure Catherine. “Dinuga pawewehe TCW (Tubagus Chaeri Wardana, Red),” kandhane Johan Budi SP.
Airin tetep setya
Jennifer Dunn
Sawatara iku, merga lara, Wawan antuk perawatan ing Rumah Sakit Polri. Airin Rachmi Diany, sisihane Wawan pranyata tetep setya ngancani bojone nalika digawa menyang RS Polri mung saderma kanggo nyumurupi kahanane sing lanang.
Wawan kang dinuga obral dhuwit sing ajine ora mekakat marang sawatara artis iki, ora gawe nglokrone Airin anggone tansah ngancani Wawan.
Disumurupi, sakehing artis kayadene Jennifer Dunn, Rebecca Soejati Reijman, lan Catherine Wilson mlebu dhaftar kang nampa dhuwit saka Wawan. Banjur, apa bener Airin wis ngapura kaluputane Wawan?
Manut psikolog Melly Puspitasari Psi, M, NLPm, pawongan bisa waras lan gelem ngapura yen nate dilarani lan dislingkuhi.
“Kita iki made in Tuhan, tamtune kita nduweni kanthong-kanthong toleransi sing siji lan sijine ora padha. Lan carane marasake uga bisa beda-beda, playune bisa menyang agama utawa keluwarga,” kandhane Melly, Senin (24/2) kepungkur.
Gegayutan karo perselingkuhan, kandhane Melly, sawijining wanita notabene (cathetan tambahan) seneng karo priya sing wis duwe bojo. Tegese, priya kasebut nduweni samubarang kang cocog lan bisa ditampa dening dheweke. “Sebab sing njalari beda-beda, apa merga donya brana utawa mung saderma papan curhat. Beda karo wong kang isih ijenan lan rata-rata pancen merga tresna,” pungkase.
Ing RS Polri iki pranyata Hj Aisyah, ibu maratuwane Walikota Tangerang Selatan Airin Rachmi Diany iki katon mbesuk mantune kang dirawat ing ruwang Cendrawasih 1 nomer 4 iku. Kejaba maratuwane, anak wuragile Wawan, yaiku Ratu Ghefira Markhamah Wardana uga melu mbesuk bapake.
Aisyah teka menganggo setelan krudhung werna soklat mawa rok werna krem. Dene Ghefira menganggo klabi putih lan kathok ireng. Rombongan iki teka karo nggawa kanthong plastik abang isi panganan lan banyu ngombe. Maratuwane Wawan iki anggone omong mung saperlune wae.
Ora watara suwe sabanjure, Aisyah metu saka ruwangan ijenan. Dene anake Wawan isih ana ing njero ngancani Airin kang wis ana ing RS Polri wiwit awan sadurunge. Aisyah gegancangan ninggalake rumah sakit numpak Toyota Innova ireng nopol B 1908 KOY.
Salah sawijining petugas KPK kang wegah disebutake jenenge ngandhakake, Wawan sing statuse tahanan ora diolehake memangan panganan saka njaban. Kanthong plastik kang digawa maratuwane mau ora oleh diwenehake marang Wawan. “Iku kanggo Airin, menawa tahanan iku wis oleh jatah dhewe,” ujare.
Pelayanan kelas 1
Rebecca Soejati Reijman
Wawan antuk perawatan ing Rumah Sakit Polri, jalaran saka asil diagnosis sauntara, dheweke nandhang lara maag kronis. “Diagnosa sauntara penyakit maag kronis, nanging perlu dianakake asil observasi sabanjure kanggo nyumurupi penyakite,” ujare Kabid Palayanan Umum Rumah Sakit Polri, Kombes Pol Ibnu Hajar.
Wawan dhewe antuk pelayanan kelas 1 klawan fasilitas kang beda karo tahanan umume, yaiku ruwang AC, Kulkas, peturon dhewe, ruwang tamu, lan jedhing dhewe. Pehak rumah sakit duwe alesan jalaran Wawan mbutuhake perawatan khusus.
“Dheweke antuk ing ruwang kelas 1, Cendrawasih,” tambahe.
Ibnu Hajar nambahake maneh, menawa ruwang Cendrawasih dhewe pancen dikhususake tumrap tahanan penting. Jalaran dheweke mbutuhake observasi lanjutan merga kahanan kesehatane pasien. “Saben tahanan kelas 1 pancen dipanggonake ing kono, ora ing ruwang perawatan tahanan umum ngelingi perlu dianakake observasi lan tumindak spesifik,” tandhese.
Perlu kawuningan, Ruwang Cendrawasih 1 ing saben tingkate dumadi saka 10 kamar perawatan. Sawengine pasien ditarik ragad Rp 260 ewu, iki durung klebu ragad kanggo dhokter.
Kabid Medik dan Perawatan RS Polri AKBP Yayok Widarto mbenerake menawa Wawan dirawat ing rumah sakit kasebut. Dheweke ngandhakake, Wawan mlebu RS klawan sakehing pisambat kang dirasakake suwene patang dina. “Teka klawan sambatan panas, sasuwene patang dina pungkasan. Dheweke uga sambat muneg-muneg lan semaput,” ujare.
Dhokter spesialis telu ing Rumah Sakit Polri kang ngawekani kadakwa panduga korupsi Pilkada Lebak lan alat kesehatan (alkes) Banten iki. Durung disumurupi kapan Wawan bisa ninggalake rumah sakit. “Sawatara dhokter disangkutake ngawekani pasien iki, dhokter spesialis penyakit dalam, dhokter syaraf, lan dhokter spesialis jantung. Pasien iki dirawat ing ruwang Cendrawasih 1 jalaran kanggo observasi sabanjure,” ujare Yayok. (SP)
Follow @wisbenbae
Post a Comment Blogger Facebook